Gustatzen zaizkizu Tako mexikarrak? Takoak dira Mexikoko sukaldaritzako plater enblematikoetako bat, eta mundu guztira zabaldu dira. Gure urratsez urratseko errezetarekin, inoiz jan dituzun tako onenak egingo dituzu.

Errezeta goxo hau antzinatik dator, gaur egungo Mexikoko biztanleek janaria uzteko, biltzeko eta garraiatzeko arto-talotxoak erabiltzen zituzten garaitik.

Mexikon, takoak askotariko osagaiz betetzen dira: oilaskoa, itsaskiak, arraina, txerria, txahala eta aukera begetarianoak (adibidez, babarrunak, onddoak eta barazki freskoak).

Gure jarraibideak betetzen badituzu, Mexikoko tako-saltoki oneneko zaporea duten tako bikainak prestatuko dituzu. Zure sukaldetik mugitu gabe, zuzenean mahaira, senide eta lagunen gozamenerako. Jarraitu irakurtzen!

Tako mexikarrak prestatzeko gure errezeta urratsez urrats

Tako mexikarrak prestatzeko osagaiak (4 lagunentzat)

• 1 kg txerri-masail.
• Oliba-olioa.
• 2 tipula gozo.
• 4 baratxuri-ale.
• 4 g jengibre.
• 1 koilaratxokada piperbeltz, aleka.
• Kaiena bat.
• 150 ml ardo zuri.
• 2 laranja.
• Limoi bat.
• Gatza.
• Erramu-orri bat.
• 2 tomate udarekara.
• Martorria.
• Koilaratxokada bat piperrauts min.
• Kumino ehoa, koilaratxokada bat.
• Gari-talotxo txikiak.

Ahuakate-krema prestatzeko osagaiak

• Ahuakate bat.
• Gatza.
• Lima bat

Krema garratza prestatzeko osagaiak

• 200 ml esne-gain fresko.
• Lima bat

Ozpinetako tipula prestatzeko osagaiak

• 2 tipula gorri.
• Gatza.
• Koilaratxokada bat piperbeltz, aleka.
• 2 iltze-belar.
• Erramu-orri bat.
• 2 lima.
• 40 ml sagar-ozpin.
• Ur epela.

Pausoz pauso

1. Presio-eltze batean, gorritu masailak, gatzez eta piperrez onduta, bi aldeetatik. Gorde geroko.

2. Geratu den oliotan, gehitu tipula zatituta, baratxuri-aleak osorik, jengibre-zatia, piperbeltz-aleak eta kaiena.

3. Salteatu guztia batera pare bat minutuz, eta gehitu piperrautsa eta kuminoa. Eragin pixka bat eta, jarraian, gehitu tomate-zatiak.

4. Bi minutu igaro ondoren, bota ardo zuria zukuak ateratzeko eta, jarraian, laranjaren eta limoiaren zukua. Bota gatza.

5. Ardoaren alkohola lurruntzen denean, sartu masailak berriro eltzean, erramu-orriarekin batera.

6. Estali presio-eltzea eta egin 45 bat minutuz, txistuka hasten denetik zenbatuta.

7. Masailak egiten diren artean, gure takoen ongailuak prestatuko ditugu:

• Ahuakate-krema: birrindu ahuakatea sardexka batekin eta nahasi gatz apur batekin eta lima-zukuarekin.
• Esne-gain garratzaren krema: nahasi bizitasunez esne-gain freskoa eta lima-zukua. Estali film paperarekin eta gorde hozkailuan 2 orduz.
• Ozpinetako tipula: moztu tipulak julianan eta nahasi gatzarekin, piperbeltz-aleekin, iltze-belarrarekin, erramu-orriarekin, lima-zukuarekin, ozpinarekin eta ur epel pixka batekin. Estali film-paperarekin eta gorde hozkailuan 2 orduz.

8. Kendu estalkia eltzeari presioa galtzen duenean, atera masailak, eta birrindu.

9. Birrindu saltsa irabiagailuarekin, eta iragazi. Jarri lapiko batean eta eraman sutara. Utzi murrizten.

10. Saltsak testura egokia hartzen duenean, gaineratu masail birrindua, nahasi, eta utzi geroko.

11. Berotu zartaginean gari-tortilla txikiak, 15 segundo alde bakoitzetik.

12. Zerbitzatzeko, jarri haragia erdian, ahuakate-krema pixka bat, esne-gain garratzaren krema, ozpinetako tipula eta martorri birrindua.

Beste gomendio batzuk

Begira zer beste aukera dituzun gure Gari-talotxo txikiekin prestatzeko.

Inspirazio mexikarreko beste errezeta bat proposatzen dizugu: Atun-takoak ahuakatearekin.

Zapore minak gustatzen bazaizkizu, dastatu gure Haragi Chilia. Gainera, erraza da prestatzeko eta kontsumitzeko.