Gustatzen zaizu Arrain-barbakoa? Aukera goxo-goxoa da, eta beti liluratzen gaitu bere zapore eta testura atseginarekin. Horregatik, aukera bikaina da errezeta arin eta osasungarriak nahi dituztenentzat.

Arrainak aukera ugari eskaintzen ditu sukaldean; horien artean, txingarretan erretzea esperientzia ezin hobea da beti. Sardinak, urraburuak, itsaskiak eta zefalopodoak... Aukera bakoitza bikain prestatzeko aholkuak emango dizkizugu.

Ausartuko zara Arrain-barbakoa batekin? Piztu sua eta ezagutu zure barbakoez gozatzeko beste modu bat!

Zure Arrain-barbakoa arrakastatsua izateko aholkuak

Lehenik eta behin, emaitza on bat lortzeko, bi xaflako parrillak edo bisigu-ontziak erabiltzea da onena. Tresna horiek erabiliz, txikitzeko edo apurtzeko arriskurik gabe eman dakioke buelta arrainari.

Igurtzi arraina oliba-olio apur batekin parrillan jarri aurretik, itsatsi ez dadin. Lehortu ez dadin, gomendagarria da erretzen den bitartean oliba-olioa edo ongarria gehitzen joatea.

Sardinak

Zure Barbakoan faltatu ezin den arrain urdin klasiko eta bikaina. Oso elikagarriak dira, omega 3 gantz-azido ugari dute, eta baita A, B eta D bitaminak eta fosforoa, potasioa, kaltzioa, zinka, iodoa, burdina eta magnesioa mineralak ere. Sardinak txingarretan erretzea, erraza izateaz gain, zapore biziaren eta goxoaren bermea da.

Aholkuak

• Koipea xurgatzeko, beti gatz lodiz ontzea gomendatzen da. Ondo gazitu behar dira parrillan jarri aurretik.
• Erre itzazu txingarretatik gertu, eta eman buelta, gehienez ere 2 minutuan behin, azala txigortu arte.
• Eta ez ahaztu limoi-zorrotada bat botatzea.

Urraburua, Lupia eta Berrugeta

Arrain zuriak dira, eta proteinak, gantz asegabeak eta B taldeko bitaminak dituzte. Txingarretan prestatzea oso erraza da: erditik irekita, xerratan edo osorik presta ditzakezu. Hiru arrainen kasuan, erditik irekita prestatzen badituzu, kontuan izan denbora gehiago eduki behar dituzula azalaren aldetik erretzen, eta, amaieran, haragiaren aldetik erre behar dituzula apur bat.

Hona hemen arrain bakoitzaren adibide bat:

Urraburu oso bat barbakoan prestatzeko aholkuak

Prestatzeko erraza da eta, duen koipeari esker, ez da lehor geratzen.

• Tripan betegarri bat jar diezaiokezu, zapore handiagoa har dezan. Adibidez, baratxuri pixka bat barrualdean eta limoi-xerra batzuk.
• Egin sakonera txikiko pare bat ebaki, beroa hobeto sar dadin.
• Proba ezazu limoizko eta oliba-oliozko marinada batekin. Gehitu hasieran eta prozesuaren erdian, pintzel bat erabiliz.

Txingarretan Lupia irekita prestatzeko aholkuak

Hau da Lupia barbakoan prestatzeko modurik ohikoena.

• Ondo prestatzeko, arraina azala behera begira duela jarri behar duzu parrillan, hau da, txingarretarantz begira.
• Kurruskari gera dadin, azala txigortu dezakezu minutu pare batez, parrilla txingarra ukitzen ari dela.
• Ondu nahi bezala, nahi duzun zaporea lortzeko. Baratxuria, tomate- eta albaka-saltsa bat edo saltsa exotikoago bat erabil dezakezu, hala nola mango- eta martorri-saltsa.

Berrugeta xerratan prestatzeko aholkuak

Berrugeta arrain erdikoipetsua da, eta oso goxo geratzen da txingarretan prestatuta.

• Prestatzeko modu egokia lupiarena bezala da: azala beherantz jarrita, txingarretarantz begira.
• Ondu nahi bezala. Adibidez, baratxuriarekin, piperminarekin eta oliba-olio pixka batekin. Limoi- eta gurin-saltsa batekin ere probatu dezakezu. Platera elikagarriagoa eta osoagoa gera dadin, gehitu brokoli edo azalore pixka bat. Horiek ere txingarretan presta ditzakezu. Edo, nahiago baduzu, gari-zainzuriak erabil ditzakezu.
• Ondu limoi-zukuarekin zerbitzatu aurretik. Goxo-goxo geratzen da!

Izokin-xerrak

Arrain urdina da, eta kalitate handiko proteina ugari ditu. D bitamina eta mineral ugari ditu, hala nola iodoa, magnesioa, fosforoa, selenioa, burdina eta kaltzioa. Izokina barbakoan prestatzeak haren berezko zaporea nabarmentzen du. Animatu probatzera!

Aholkuak

• Jarri laranja- edo limoi-xerra batzuk parrillaren gainean eta, ondoren, jarri izokin-xerra horien gainean, larruazala beherantz duela. Horrela, arraina parrillan itsatsita geratzea saihestuko duzu.
• Azala txigortzen hasten denean, eman buelta limoi- eta laranja-xerren gainean.
• Saiatu gehiegi ez erretzen, zukuari eutsi eta lehor gera ez dadin.
• Ondu xerrak laranja, limoi, soja-saltsa eta ziape-zukuarekin egindako marinada batekin; ezin hobeto geratzen da-eta arrain urdin honekin.
• Ausartu zaitez izokinaren zaporea indartzera gure ekialdeko Saltsaren batekin.

Olagarro-hanka egosiak

Olagarroak B2 bitamina ugari du. Gainera, funtsezko mineralak ditu, hala nola fosforoa, zinka, kaltzioa, magnesioa, sodioa eta potasioa. Txingarretan ondo egina, zapore nabarmena du, eta testura leuna eta oso atsegina. Ez du huts egiten!

Aholkuak

• Olagarroa parrillan jartzeko une egokia da txingarrak kea botatzeari utzi eta bero dagoenean.
• Jarri hankak osorik parrillan eta eduki alde bakoitza 3 eta 5 minutu artean, urre-kolorea hartzen duten arte.
• Moztu olagarroaren hankak xerratan, ondu gatz lodiz edo ezkata-gatzez (ez bota gatzik sutatik atera arte, ez lehortzeko) eta gehitu zorrotada bat oliba-olio.
• Hornigai gisa, parmentier purea (patata- eta gazta-pure bat) erabiltzea iradokitzen da.
• Garrantzitsua da hotz ez geratzea. Zaporea eta testura bete-betean gozatzeko, parrillatik atera bezain pronto jan.

Txibia

Txibia txingarretan prestatzeak bere nutrizio-balio handia aprobetxatzea dakar: A, B eta E bitaminak eta selenioa, kaltzioa, iodoa eta antzeko mineralak. Prestatu txibia txingarretan, eta gozatu haren haragi sendoaz eta zapore bereziaz.

Aholkuak

• Jar ezazu txingarretatik ahalik eta gertuena, eta eduki 2-3 minutuz alde bakoitzetik. Prestatzeko denbora aldatu egin daiteke piezaren lodieraren arabera.
• Igurtzi baratxuri eta perrexil pixka batekin; horrek parrillan itsastea saihestuko du, eta zapore-ukitu bat emango dio.
• Prest dagoenean, bota gatza, ur gehiegi bota ez dezan eta gogortu ez dadin.
• Prestatu ongarri on bat olioarekin, ondo xehatutako baratxuriekin eta perrexil xehatuarekin; ongarririk onena da txibiarentzat. Maionesa ere ondo geratzen zaio.
• Arrainari laguntzeko, txingarretan egindako barazkiak edo entsalada fresko bat erabil ditzakezu.

Ganboiak

Barbakoan ezin da itsaskirik faltatu. Ganboiek omega 3 ugari dute, baita E eta B6 bitaminak eta kaltzioa, burdina, fosforoa, potasioa, magnesioa, selenioa eta iodoa mineralak ere. Txingarretan prestatuta, ganboiek zapore bizia eta testura mamitsua dute.

Aholkuak

• Puntu egokian gera daitezen, jar itzazu txingarretatik hurbil, eta ez utzi minutu bat baino denbora gehiagoz alde bakoitzetik. Urre-kolorea hartu behar dute kanpotik, eta mamitsu geratu behar dute barrutik.
• Baratxuri pixka batekin eta perrexil-olio pixka batekin marinatu ditzakezu, zapore-ukitu bat emateko.
• Broxeta moduan ere jan ditzakezu, barazkiekin batera.

Patatak eta tipulak txingarretan

Zure arrainarentzako aliatu onenaren bila ari bazara, patata eta tipula batzuk prestatu ditzakezu txingarretan. Horretarako, bildu tipulak eta sardexkarekin zulatutako patatak aluminiozko paperean, eta jarri txingarren artean. Utzi erretzen 40 minutu inguru.

Beste gomendio batzuk

Txingarrak prestatu bitartean ahosabaiari atsegin emateko, eman begirada bat pikniketarako eta aire zabaleko uneetarako gure Aperitiboen aukerari.

Lupia gustuko baduzu, eman begirada bat errezeta honi: Lupia ozpin-olioarekin eta txirlekin.

Prestatu Olagarroa Lagareiro erara: Portugalgo sukaldaritzako plater tradizionala, labean prestatua!