Egunero berresten dugu zeliakoekin dugun konpromisoa. Gure glutenik gabeko produktu-aukerak hedatzen jarraitzen dugu, mota horretako 1.550 erreferentzia baititugu dagoeneko. Horrez gainera, lankidetzan dihardugu herrialdeko zeliakoen elkarte nagusiekin.
Datorren maiatzaren 16a Zeliakoen Nazioarteko Eguna da. Gaixotasuna ikusgai jartzeaz gainera, Mercadonak zure jatorduak planifikatzeko lana erraztu nahi dizu, asteko menurako glutenik gabeko proposamen hauekin. Gozatu errezeta gozo hauetaz!
Gosariak
Astelehena
Glutenik gabeko ogi txigortua cottage gazta freskoarekin, ahuakatearekin, cherryekin eta haziekin.
Asteartea
Glutenik gabeko ogi biribilaren txigorkia hummusarekin, ardi-mihiarekin eta tomate lehorrekin.
Asteazkena
Glutenik gabeko ogi biribilaren txigorkia arrautza nahasiekin, txanpiñoiekin eta ehotako piperbeltz beltzarekin
Osteguna
Arroz-talotxoak kakahuete-kremarekin, bananarekin eta ahabiekin.
Ostirala
Glutenik gabeko ogi txigortua izokinarekin, arrautza egosiarekin, ahuakatearekin eta tipulinarekin.
Bazkariak
Tomate-tarta gazia
1. Moztu xerratan 3 tomate udarekara eta ebaki erditik 200 g cherry tomate.
2. Nahasi 125 g ahuntz-gazta, koilarakada bat esne, 150 g ricotta, tipulina (koilarakada-erdia), ehotako piperbeltz beltza eta limoi-azal arraspatua.
3. Aldez aurretik, berotu labea 180 ºC-ra.
4. Zabaldu hostorea erretilu batean, labeko paperaren gainean, eta jarri gainean gazta-nahasketa.
5. Jarri tomateak gainean, eman gatza, bota olio-zurrusta bat, eta, amaitzeko, bota koilarakada-erdi tipulin eta oregano.
6. Pintatu hostorearen ertzak arrautza irabiatuarekin.
7. Egin labean 180 ºC-an 20 bat minutuz, ertzak gorrituta ikusi arte.
Noodleak ganboi-isatsekin, zainzuriekin eta perretxikoekin
1. Irakin 150 g noodle 2 minutuz.
2. Jarri olio apur bat zartagin batean, salteatu perretxiko-pakete bat, eta gaineratu 125 g zainzuri zati txikitan ebakita, 125 g ganboi-isats eta baratxuri-atal bat, xehatuta.
3. Gaineratu zartaginera egositako noodleak, eta bota glutenik gabeko soja-saltsa, nahi adina.
4. Saltsa ongi integratuta dagoenean, jarri gainean 20 g kakahuete xehatu eta zerbitzatu.
Entsalada ardi-mihiarekin, gereziekin eta burratarekin
1. Salteatu zartagin batean 40 g hirugihar, gorritu arte. Utzi paperaren gainean, koipea xurga dezan.
2. Ebaki gerezi batzuk erditik eta hezurra kendu.
3. Zartagin batean, oliorik gabe, txigortu apur bat 2 koilarakada-hazi.
4. Entsalada prestatzeko, jarri ardi-mihia lehenengo (100 g), eta ondoren burrata bat erdian, hirugiharra, gereziak eta haziak.
5. Ondu gatzarekin eta olioarekin, eta zerbitzatu.
Espagetiak carbonara erara perretxikoekin
1. Zartagin zabal batean salteatu 250 g perretxiko olio apur batekin, 10 minutuz.
2. Irakin 200 g espageti ur gazi ugaritan.
3. Bien bitartean, irabiatu 3 gorringo eta nahasi 40 g parmesanorekin eta unean bertan ehotako piperbeltz beltzarekin.
4. Atera espagetiak 6 edo 7 minutu igaro ondoren, iragazi eta nahasi emeki perretxikoen salteatuarekin.
5. Espagetiak sutatik atera ondoren, gehitu arrautza- eta gazta-nahastea, eta ongi nahasi, kontu handiz, espagetiak ez daitezen apurtu.
6. Zerbitzatu eta, amaitzeko, jarri unean bertan arraspatutako Grana Padano gazta eta piperbeltz beltz ugari.
Gazta-gnocchi beteak eta gratinatuak
1. Zartagin batean, salteatu 2 baratxuri-atal osorik eta zurituta, olio apur batekin.
2. Nahasi 300 g tomate zatitu bere zukuarekin, eta gaineratu zartaginera. Egin gatza eta piperra, eta utzi su eztian urritzen 10 minutuz.
3. Zatitu 70 g mozzarella kubotan, jarri iraztontzi batean eta sakatu, uraren parte bat kentzeko.
4. Egosi ur irakinetan 400 g gnocchi 2 minutuz eta iragazi.
5. Kendu baratxuriak tomatetik, eta gaineratu koilaratxokada bat oregano eta gnocchiak.
6. Jarri gazta-nahastearen erdia gnocchietan.
7. Igurtzi gurinarekin laberako ontzi bat, jarri gnocchiak, bota gatza behar izanez gero, estali tomate-geruza fin batekin eta hautseztatu gainerako gazta.
8. Egin eta gratinatu labean 10 minutuz 250 ºC-an.
Afariak
Oilasko- eta ahuakate-entsaladilla
1. Txikitu ozpinetako 4 luzoker zati txikitan eta ahuakate bat 3 zentimetro inguruko kubotan.
2. Nahasi 140 g oilasko-zerrenda 100 g gazta-kremarekin, luzoker txikituekin, arto gozoaren pote-erdi batekin eta ahuakate-zatiekin.
3. Ahuakatearen azalean zerbitzatu daiteke, gainetik arto gozoa, martorri txikitua eta oliba-olio zurrusta bat botata, glutenik gabeko picoekin batera.
Lupia ilarrekin eta espinaka-saltsarekin
1.Galdarraztatu espinakak 15 segundoz litro bat ur irakinetan. Atera berehala ura eta izotza dituen ontzi batera, hozteko.
2. Zartagin batean, gorritu baratxuri-atal txikitu bat eta tipula gozo baten erdia, txikituta. Biguntzen direnean, bota 150 ml ardo zuri eta utzi alkohola lurruntzen.
3. Jarri 150 g espinaka irabiagailuan, gehitu limoi-erdi baten zukua eta baratxuri, tipula eta ardo zuriarekin egindako nahastea, eta irabiatu, fin-fin utzi arte. Pasatu iraztontzitik, zuku guztia ateratzeko.
4. Zartagin batean, salteatu 3 koilarakada-ilar olio apur batekin, eta eragin noizean behin, desizoztu arte. Gaineratu espinaka-saltsa, iragazita, eta berotu guztia.
5. Saltsa lodiagoa nahi izanez gero, arto-irin finaren koilaratxokada bat disolbatu ur hotz apur batean eta gehitu saltsa berdeari.
6. Laberako erretilu batean, paper begetalaren gainean, jarri 2 lupia-solomo gatzarekin eta olioarekin. Egin labean 10 minutuz, 180 ºC-an.
7. Atera lupia-solomoak saltsara, nahasi zukuak eta zerbitzatu plateretan.
8. Jarri gainetik limoi-erdiren azal arraspatua
Hegaluze-hanburgesak
1. Irabiatu arrautza bat, eta gaineratu glutenik gabeko ogi arraspatuaren 2 koilarakada.
2. Zatitu 250 g hegaluze laukitan, eta irabiatu pixka bat irabiagailuan: fin geratu behar du, baina ez pasta baten moduan.
3. Nahasi hegaluzea, gatzarekin eta piperrarekin ondua, tipula-hauts koilaratxokada bat, jengibre-hautsaren koilaratxokada bat eta 2 koilaratxokada soja-saltsa. Utzi hozkailuan pare bat orduz.
4. Eratu bi hanburgesa, eta egin zartagin batean olio apur batekin, 3 minutuz alde bakoitzetik, gutxi gorabehera.
5. Patata-lastoekin eta plantxan egindako arrautza batekin atera daitezke, edo glutenik gabeko ogiaren gainean zerbitzatu.
Lekak urdaiazpikoarekin eta almendrekin
1. Egosi lekak 8-10 minutuz kazola batean, litro bat ur irakinetan. Geroko utzi ur horren parte bat.
2. Zartagin batean, oliorik gabe, txigortu 20 g almendra xerratu, eta utzi geroko.
3. Jarri olio apur bat zartagin berean, eta erregosi porru-erdi bat eta tipula-erdi bat, fin-fin ebakita. Bota gatza eta piperra, eta erregosi 8 bat minutuz.
4. Gaineratu 80 g urdaiazpiko-takotxo, eta eragin pare bat minutuz. Gehitu lekak segidan eta nahasi ongi.
5. Lekak egosteko erabilitako uretan (100 ml), disolbatu arto-irin finaren koilarakada bat, eta gaineratu lekei.
6. Irakin, saltsa loditu arte.
7. Jarri gainetik almendra-xerrak eta zerbitzatu.
Oilasko-izterrerdiak garagardoarekin
1. Gazitu 600 g oilasko-izterrerdi, eta frijitu lapiko batean olioarekin, gorritu arte. Utzi geroko.
2. Ontzi berean, gehitu tipula gozo bat, juliana eran fin-fin ebakita. Bota gatza eta piperra, eta erregosi 10 minutuz.
3. Gehitu oilasko-izterrerdiak, eragin eta bota 2 lata garagardo.
4. Urritu su ertainean, saltsa zaporetsu bat eratu arte.
5. Zerbitzatu, alboan patata-purea duela.
Beste gomendio batzuk
Gure errezeten atalean zeliakoentzako beste aukera batzuk ere aurkituko dituzu; hona hemen batzuk: Glutenik gabeko pizza eta Glutenik gabeko barazki kurruskariak.
Lagundu zure platerak Glutenik gabeko pico kurruskari hauekin.
Gogoratu zure saski orekatuan fruitu lehorrak sartzeaz. Adibidez, gure Pistatxoen aukerak: gatzik gabeko pistatxo txigortuak eta pistatxo natural zurituak. Glutenik gabeak dira aukera biak.