Inoiz entzun duzu ezer Tahiniaz? Apenas ezagutzen dugu gurean, baina, apurka-apurka, ari da tokia egiten, batez ere beren burua zaintzea gustuko dutenen artean.

Horrexegatik erakutsi nahi dizugu Ekialde Ertainean sorturiko pasta hau, sesamo-haziz egina, eta kontsumitzeko hainbat modu ere proposatuko dizkizugu. Ikusiko duzu zeinen ederra!

Tahiniaren ezaugarriak eta propietateak

• Tahinia pasta bat da, % 100 sesamo-haziz egina.
• Produktu horren ezaugarri nagusia da erabat naturala dela.
• Osagai bakarra du, eta, beraz, batere gehigarririk ez.
• Ez dauka laktosarik eta glutenik, eta aproposa da dieta beganoetarako.
• Produktu osasungarria da, gantz asegabe eta zuntz ugarikoa.

Prestatzeko eta kontsumitzeko moduak

Primerakoa da txigorkietan zabaltzeko, fruta edo entsaladei laguntzeko, pita-ogia bertan bustitzeko, edo beste hainbat errezeta prestatzeko, hala nola Humusa edo Baba Ghanousha. Hona hemen horietako batzuk:

Baba Ghanousha

• Egin erditik berenjena bat, eta gazitu.
• Erantsi olio pitin bat, itsatsita gera ez dadin, eta erre labean 40 minutuz, 200 ºC-an.
• Utzi hozten, eta hustu berenjena koilara batekin; ondoren, txikitu sardexkarekin, harik eta pure egin arte, berenjena-zatitxoren batzuk utzita.
• Erantsi koilaratxokada bat kumino, koilarakada bat jogurt greko, gatza eta piperbeltza. Nahastu.
• Ondoren, erantsi limoi-erdi baten zukua eta koilarakada bat tahini. Nahastu nahi bezalako testura lortu arte.
• Ipini platerean eta berdindu. Apaindu perrexil xehatu pixka batekin, piperrauts gozoarekin eta olio zorrotadatxo batekin.

Brokoli salteatua almendra xerratuekin eta tahini-saltsarekin

• Moztu 200 g brokoli arbolatxo txikitan. Ipini zartagin batean olio pixka bat, eta salteatu brokolia minutu batzuetan –txanda txikitan, brokolia ez dadin pilatu zartaginean–.
• Gehitu 30 g almendra, xerratan eginda. Almendrak pitin bat gorritu bitartean eta brokolia al dente dagoela, hautseztatu koilarakadatxo bat kumino, eta zerbitzatu platerean.
• Irabiagailu edo mixer batean, gehitu tahinia –lau koilarakada mardul–, bi baratxuri-ale, 75 ml limoi-zuku eta arrasean betetako koilaratxokada bat gatz –tontortu gabe–.
• Apaindu platereko brokolia, tahini-saltsarekin gozatuta.

Platano-, ahabi- eta tahini-txigorkia

• Ogi biribilaren gainean, igurtzi tahinia, ipini platanoa –trontzotan eginda–, dozena erdi ahabi, eta hautseztatu sesamo-hazi xigortuekin.
• Horretarako, sesamo-haziak txigortu behar dira aurretik zartaginean su bizian, oliorik gabe bost minutu inguruz, harik eta gorritu arte.

Tahini-, datil- eta olo-galletak

• Mixer edo irabiagailu batean, xehatu 200 g tahini eta 170 g datil zatikatu. Nahastu ondo 200 g olo ehorekin, harik eta ore homogeneo bat lortu arte. Baliteke datil-zatitxoren bat geratzea.
• Lortutako orearekin, moldekatu bospasei galleta, gaineratu sesamo-haziak nahieran, eta ipini laberatzeko paper gainean, aurretik oliba-olio pixka batekin igurtzita.
• Laberatu 15 minutuz, 180 ºC-an. Utzi hozten, eta bapo jatera!

Beste gomendio batzuk

Igurzteko beste krema osasungarriren bat nahi baduzu, hamaikatxo aukera eskaintzen dituena, agian interesatuko zaizu gure kakahuete-krema.