Nori ez zaio noizean behin gertatzen? Ogia oinarrizko elikagai bat da, egunerokoa eta gure dieta orekaturako beharrezkoa. Baina behar dugun baino gehiago erosten dugu askotan, eta gogortu egiten da. Edo ez dugu jakiten zer egin jan gabe geratu zaigun ogiarekin. Edo iraungitze-datara iristeko denbora gutxi geratzen zaion moldeko ogia izan eta aprobetxatu nahi dugu, edo, besterik gabe, beste modu batean kontsumitzeko gogoa sortu zaigu.
Gertatzen zaizu halakorik? Kasu horietan guztietan, ogia botatzea azken aukera da. Ogia aprobetxatzeko eta haren bizitza baliagarria luzatzeko aukerak emango dizkizugu, bai ogi-barretarako, bai moldeko ogirako: zenbait truko emango dizkizugu ogi lehorra berrerabiltzeko, sobratutako ogiarekin pastel gaziak, pastel gozoak eta gozokiak egiteko, moldeko ogiarekin enpanadillak egiteko, etab.
Aukera asko daude, eta interesgarrienetako batzuen berri emango dizugu. Ez alferrik galdu ogia, eta prestatu errezeta erraz, erabilgarri eta gozo hauek.
Ogia aprobetxatzeko 3 ideia onenak
Prestatu enpanadilla gozo batzuk sobratutako moldeko ogiarekin
Errezeta gozo-gozoa da, erraza bezain harrigarria; etxeko txikienekin egiteko aproposa. Bikaina. Proposatzen dizugun betegarria presta dezakezu edo gustukoago duzun beste bat. Zenbait motatako enpanadillak ere egin ditzakezu eta erretilu batean zerbitzatu.
1. Prestatu enpanadillen betegarria. Xehatu atuna ontzi batean eta gaineratu arrautza txikituak eta tomatea. Nahasi ore bat lortu arte.
2. Ebaki moldeko ogiaren ertzak eta zanpatu ogi-xerrak arrabol batekin.
3. Aldez aurretik, berotu labea 180 ºC-ra.
4. Jarri enpanadillen betegarria (koilarakada bat) ogi-xerra bakoitzaren erdian.
5. Tolestu hirukia eta zigilatu ertzak sardexkaren laguntzaz.
6. Pintatu enpanadillak arrautza irabiatuarekin, eta egin labean 10-15 minutuz, edo kurruskari geratu arte.
Berrerabili ogia urdaiazpiko- eta gazta-pastel gazi bat prestatzeko
Atzoko edo duela egun batzuk lehenagoko ogia aprobetxatzeko errezeta perfektua. Sinestezina da ogi-hondarrekin halako pastel atsegingarri eta gozoa lor daitekeenik, bai zaporeari bai testurari dagokienez. Jarraitu gure urratsei.
1. Ontzi batean, xehatu ogia zati txikitan.
2. Gaineratu esnea, eta nahasi, ogiak esnea xurga dezan.
3. Irabiatu arrautzak eta gaineratu ontziari, gatzarekin, piperbeltzarekin, urdaiazpikoarekin eta gaztarekin batera. Utzi urdaiazpiko- eta gazta-zati batzuk, apaintzeko.
4. Nahasi guztia.
5. Estali molde baten oinarria labeko paperarekin, eta igurtzi olio pixka bat moldearen ertzetan.
6. Jarri nahastea moldean, guztiz estali arte, eta guztiaren gainean ipini urdaiazpiko- eta gazta-zatiak.
7. Sartu labean 35 minutu inguru, 180 ºC-an.
8. Utzi epeltzen moldetik atera aurretik.
Aprobetxatu ogia budin bat prestatzeko
Errezeta hau konplexuagoa da; aproposa sukaldari trebe eta ausartentzat. Hala ere, gure urratsei jarraitzen badiezu, zoragarri aterako zaizu.
1. Moztu ogia zati txikitan.
2. Aldez aurretik, berotu labea 180 ºC-ra.
3. Berotu esnea ontzi batean, su eztian, azukrearekin, kanelarekin eta limoi-azalarekin, aromatizatzeko. Irakiten hasten denean, kendu ontzia sutatik eta atera kanela eta limoi-azala.
4. Gehitu esnea ogi-zatiei, eta utzi epeldu arte.
5. Birrindu beratutako ogia, gaineratu arrautzak eta berriro birrindu.
6. Jarri karamelua moldearen oinarrian eta zabaldu.
7. Isuri nahastea karamelua duen moldean, eta egin labean, Maria bainuan, 40-45 minutuz (180 ºC). Sartu zotz edo aizto bat. Garbi ateratzen bada, budina eginda dagoela esan nahi du. Bestela, eduki minutu batzuk gehiago.
8. Itxaron ondo hoztu arte moldetik ateratzeko.
Beste gomendio batzuk
Ezagutu gure Ogi biribilen aukera aparta eta haietako bakoitza kontsumitzeko proposamenak.
Dastatu Piadina, prestaketa-modu ugari eskaintzen dituen italiar estiloko ogia.
Ikusi dituzu Gosari perfekturako gure ideiak? Zuretzako gosari egokiena zein den jakingo duzu.