Kontsome bikain bat proposatzen dizugu; koilaraz jateko plater bat, zapore bizi eta suspergarria duena. Aukera bikaina izan daiteke Gabon gaueko afarirako, Eguberri eguneko bazkarirako, edo, oro har, urte-sasoi honetan antolaturiko edozer otordutarako.

Kontsomearen tradizioa Gabonekin lotzen dugu, baina neguko beste edozer unetan ere kontsumi daiteke. Errezeta hau aukera apartekoa da garaiotan haragi-kontsomearen tradizioari jarraitu nahi izanez gero, baina ukitu berrituarekin prestatzeko.

Oso erraza da prestatzen: atera eltzeak eta ekin lanari; pausoz pauso azalduko dizugu eta nola prestatu.

Kontsomea haragi-bolekin eta galeper-arrautzekin, pausoz pauso

4 lagunentzako osagaiak

Saldarako

• 1 txerri-hanka.
• 1 txerri-hezur zuri gazitu.
• Eltzekorako haragi-osagarriak, 1 azpil.
• 1 urdaiazpiko-hezur.
• Eltzekorako barazki-osagarriak, 1 azpil.
• 1 tipula gozo.
• 4 iltze-belar.

Haragi-boletarako

• 300 g haragi xehatu (behikia eta txerrikia nahasian).
• 1 baratxuri-atal.
• ½ edalontzi esne oso.
• 8 galeper-arrautza.
• 2 xerra ogi gogor.
• Perrexila.
• Gatza.
• Gari-irina.
• 1 arrautza.
• Piperbeltz beltza.

Pausoz pauso

1. Jarri eltze handi batean 5 litro ur eta gatz pixka bat, egosteko haragiak, hankak eta hezurrak.

2. Irakiten hasten denean, kendu gaineko aparra, eta egosi su motelean 2 orduz, gutxi gorabehera.

3. Garbitu, zuritu eta laurdenetan zatitu barazkiak. Sartu saldan.

4. Sartu iltzeak tipulan, eta jarri hura ere eltzean. Egosi beste ordubetez su motelean.

5. Bien bitartean, egosi galeper-arrautzak ur irakinetan 4 minutuz. Utzi geroko.

6. Beratu ogi-xerrak esnetan, eta zanpatu sardexka batekin.

7. Txikitu fin-fin baratxuria eta perrexila. Gehitu guztia haragi xehatuari: baratxuria, perrexila, arrautza eta beratutako ogi-mamia. Eman gatza eta piperra.

8. Ondo nahasi, eta egin bola txikiak. Pasatu arinki irinetatik, eta utzi geroko.

9. Salda hozten utzi ondoren, iragazi, eta eman gatza. Utzi hezurrak alde batera, eta gorde haragia eta barazkiak beste errezeta batzuetarako (pureak, kremak, kroketak, eta abar).

10. Salda iragazi ondoren, irakinarazi. Une horretan, sartu haragi-bolak eta egosi 2 minutuz.

11. Zerbitzatzeko unean, gehitu bakoitzari bi galeper-arrautza, erditik ebakita.

Chefaren sekretua

Kontsome mardulagoa nahi izanez gero, gehitu fideo finak edo gustuko duzun pasta; pasta barrubetea ere izan daiteke.

Beste gomendio batzuk

Otordua koilararekin jateko plater bero batekin hasi nahi baduzu, hona hemen 3 krema-errezeta osasungarri.

Animatzen Bakailao-kauserak prestatzera, hasierako plater gisa?

Amaitzeko, probatu gure Glutenik gabeko limoi-moussea, arina eta freskagarria.