Ikasi nahi duzu hostore-pastel goxo-goxo bat prestatzen? Imajinatzen duzu hostorearen testura kurruskaria porruen eta perretxiko aromatikoen aberastasunarekin nahasian? Bada, horixe prestatu dizugu, errezeta ikas dezazun eta Gabonetan edo nahi duzunean zerbitza dezazun.

Pastel gazi hau prestatzea ematen duen baino errazagoa da. Prest zaude zure maiteen bihotza (eta urdaila) limurtzeko? Jarraitu gure argibideei.

Hostore-pastela porruekin eta perretxikoekin, pausoz pauso

4 lagunentzako osagaiak

• Zapore biziko perretxiko-mixak, 2 azpil.
• 2 porru.
• 3 arrautza.
• 2 hostore-lamina.
• 300 ml kozinatzeko esne-gain fresko.
• 1 tipula gozo.
• Gatza.
• Piperbeltz zuria.
• Oliba-olioa.

Pausoz pauso

1. Ziztatu hostore-orri bat sardexka batekin, zulo txiki batzuk egiteko.

2. Jarri labeko papera (bilgarrian dator) laberako molde errektangular bati, eta bertan jarri zulatutako hostorea. Hoztu hozkailuan, labean sartzerako hotz-hotza egon dadin.

3. Moztu porruak xerratan, eta txikitu fin-fin tipula. Sueztitu olio apur batekin zartagin batean. Eman gatza eta piperra.

4. Zuritzen hasten direnean, gaineratu perretxikoak, eta salteatu.

5. Bota esne-gaina. Irakiten hasten denean, gaineratu 2 arrautza irabiatu, eta eragin etengabe. Bota gatz gehiago behar badu, eta piperbeltz zuria.

6. Bete hostorea moldean, eta itxi. Ebaki zerrenda batzuk bigarren hostore-orritik, pastelaren gainaldea apaintzeko abar-antzekoak eginez.

7. Busti arrautza irabiatu batekin eta egin labean 180 ºC-ra, beroa goian eta behean jarrita. Utzi egiten gorritu arte.

Chefaren sekretua

Errezeta hau egokia da hasierako plater gisa, eta plater nagusi gisa ere zerbitzatu daiteke. Entsalada bat presta dezakegu laguntzeko, zenbait letxuga zitrikoekin onduta; gazta-saltsa beroak ere ondo datozkio. Tipula karamelizatua ere osagarri egokia da.

Beste gomendio batzuk

Izokin-quichea da erraz prestatzeko beste errezeta arin bat, ganba, tipula, arrautza eta esparragoekin.