Vas cociñar este Nadal? Se buscas un prato elegante e sofisticado que deixe plenamente satisfeitos aos teus comensais, esta Robaliza con vinagreta e ameixas é unha excelente elección.
A combinación de sabores e texturas é infalible. A robaliza, suave e saborosa, reálzase cunha vinagreta que anima cada bocado. As ameixas completan esta preparación co seu profundo sabor a mar.
É moi fácil de preparar! Pon o forno a quentar e prepara as tixolas, se segues as nosas indicacións vaiche saír fenomenal.
Paso a paso para preparar a nosa receita de Robaliza con vinagreta
Ingredientes para 4 persoas
- 4 lombos de robaliza.
- 420 g de ameixas.
- Ceboliño.
- 1 tomate pera.
- ½ limón.
- ½ cebola tenra.
- ½ vaso de leite.
- Pementa negra.
- Sal.
- Aceite de oliva.
- Vinagre de xerez.
- 15 g olivas negras.
Paso a paso
1. Salpementa os lombos de robaliza. Nunha bandexa para forno verte un pouquiño leite e un fío de aceite. Coloca os lombos coa pel cara a arriba. Mete no forno a 200 ºC uns 5 minutos.
2. Nunha tixola con moi pouco aceite, refoga as ameixas a lume intenso ata que abran. Reserva.
3. Fai unha vinagreta: pica moi fino o ceboliño, a cebola tenra, o tomate pelado e as olivas sen óso. Mestúrao todo nun cunco.
4. Adereza cun chorriño de vinagre de xerez, aceite, zume de limón, sal e pementa. Engade o zume que deixaron as ameixas ao abriren. Remove.
5. Coas robalizas fóra do forno, emprata cada lombo coas ameixas e coroa cunhas culleradas de vinagreta por enriba.
Segredo do xefe de cociña
Ao refogar as ameixas, engade un chorriño de viño branco para potenciar o seu sabor. Non botes sal nin limón durante a cocción.
Outras recomendacións
Se buscas ideas para pratos de peixe, aquí tes esta Receita de bacallau con muselina de allo.
Completa o teu menú con este Plumcake de pataca doce e pistachos.
Xa están aquí os clásicos de sempre na nosa selección de Turróns, que tamén trae novidades.