Propoñémosche un consomé con fundamento, un prato de culler de sabor profundo e reconfortante. Pode facer un excelente papel na túa cea de Noiteboa, xantar de Nadal ou ser parte importante de calquera celebración nesta tempada.

A tradición do consomé encarna o espírito do Nadal, pero pode consumirse en calquera momento do inverno. Esta receita é a elección ideal para aqueles que queren seguir a tradición do consomé de carne nestas datas, pero darlle un toque renovado.

É moi fácil de preparar, saca as túas potas e ponte mans á obra coa nosa guía paso a paso.

Paso a paso para preparar a Receita de Consomé con albóndegas e ovos de paspallás

Ingredientes para 4 persoas

Para o caldo

• 1 man de porco.
• 1 óso branco salgado de porco.
• 1 bandexa de arranxo de carne para cocido.
• 1 óso de xamón.
• 1 bandexa de verduras para cocido.
• 1 cebola doce.
• 4 cravos.

Para as albóndegas

• 300 g de carne picada de vacún e porco.
• 1 dente de allo.
• ½ vaso de leite enteiro.
• 8 ovos de paspallás.
• 2 rebandas de pan duro.
• Perexil.
• Sal.
• Fariña de trigo.
• 1 ovo.
• Pementa negra.

Paso a paso

1. Pon nunha pota grande con 5 litros de auga e un chisco de sal, as carnes do arranxo para cocido, as mans e os ósos.

2. En canto empece a ferver, retira a escuma da superficie e coce a lume lento unhas 2 horas.

3. Lava, pela e parte as verduras en cuartos. Introdúceas no caldo.

4. Insire os cravos na cebola e incorpóraa tamén á pota. Cociña 1 hora máis a lume suave.

5. Mentres tanto, coce os ovos de paspallás en auga fervendo durante 4 minutos. Reserva.

6. Remolla en leite as rebandas de pan e machuca cun garfo.

7. Pica moi fino o allo e o perexil. Engade todo á carne picada: allo, perexil, o ovo e a miga do pan remollado. Salpementa.

8. Mestura moi ben e forma pequenas albóndegas. Pásaas levemente por fariña e reserva.

9. Tras deixar arrefriar o caldo, cóalo e rectificas de sal. Descarta os ósos e reserva a carne e as verduras para outras receitas (purés, cremas, croquetas, etc.).

10. Unha vez coado o caldo, pono a ferver. Enseguida, introduce as albóndegas e cóceas apenas 2 minutos.

11. Sirve engadindo para cada comensal dous ovos de paspallás partidos pola metade.

Segredo do xefe de cociña

Se queres darlle máis consistencia ao consomé, engade fideos finos ou unha pasta que che guste, incluso pode ser con recheo.

Outras recomendacións

Se queres empezar o teu xantar ou a túa cea cun prato quente de culler, dámosche 3 receitas de Cremas saudables.

Anímaste a preparar unhas Chulas de bacallau para os teus entrantes?

Para finalizar, proba a nosa Mousse de limón sen glute, lixeira e refrescante.