Xa é tempada de cabaza, un produto do outono moi versátil e cunha rica tradición culinaria. Esta xoia da nosa gastronomía deleita o noso padal cunha ampla gama de sabores e texturas.

O sabor da cabaza é suave e lixeiramente doce, cun toque terroso que a fai inconfundible. Ademais, destaca pola súa incrible versatilidade na cociña. Cando se cociña adecuadamente vólvese tenra e suave, e isto convértea na elección perfecta para sopas, purés, pasteis e outros pratos que requiren unha consistencia cremosa. Non obstante, tamén podes deleitarte cunha cabaza asada ou á grella, que lle confire unha textura firme e un sabor acaramelado, engadíndolles unha nova dimensión ás túas creacións culinarias.

Para que aproveites todas as posibilidades da tempada de cabaza, aquí tes unhas cantas suxestións.

4 deliciosas receitas con cabaza

Cabaza con recheo de tenreira

1. Abre 1 cabaza cacahuete e quita as sementes. Fai algúns cortes na cabaza para axudala a asar.

2. Introdúcea no forno quente a 180 ºC, aderezada cun chorriño de aceite de oliva, sal e pementa e cociña durante uns 40 minutos ata que estean tenras e lixeiramente tostadas.

3. Cunha culler, retira unha pouca cabaza, intentando deixar a pel intacta.

4. Mentres tanto, rustre 1 cebola con 2 dentes de allo e 1 folla de loureiro. Agrega 500 g de carne para guisar, 1 lata de tomate en anacos e 2 copas de viño tinto. Cociña durante uns 45 minutos ou ata que a carne comece a desfacerse.

5. Cun garfo esmigalla a carne, mestúraa coa salsa e agrega a carne de cabaza que se retirou inicialmente.

6. Sazona ben e enche as cabazas con esta mestura de carne.

7. Esparexe perexil picado.

Hummus de cabaza con pemento e pipas de cabaza

1. Asa 500 g de cabaza no forno quentado previamente a 180 ºC ata que estea branda.

2. Colócaa nun coador e preme ata que non quede líquido.

3. Escorre 1 bote pequeno de garavanzos.

4. Xunta os garavanzos, a cabaza, o zume de 1 limón, 1 cullerada de tahini, aceite, sal e comiño nun batedor. Tritura ata que estea moi cremoso.

5. Coloca nun prato e esparexe pemento, pipas de cabaza e coandro picado.

Cookies de cabaza con pebidas de chocolate

1. Coloca 400 g de cabaza en anacos nunha bandexa e métea no forno a 180 ºC cuns anaquiños de manteiga (50 g aprox.) ata que estea tenra e se poida pinchar facilmente cun coitelo.

2. Cando tempere, coloca nun coador fino e deixa escorrer ben, premendo para eliminar o exceso de auga. Deixa escorrer durante polo menos 30 minutos.

3. Estende a cabaza nunha bandexa de forno e coloca papel absorbente enriba para eliminar toda a humidade posible. Tritura e reserva 120 g para a receita.

4. Mestura 240 g de fariña, 1 culleradiña de impulsor, ½ culleradiña de bicarbonato, un pouquiño sal e as especias: canela, noz moscada e xenxibre (un chisco de cada unha).

5. Nun cunco, bate 150 g de manteiga abrandada previamente con 100 g de azucre moreno ata que quede unha crema esponxosa. Engade 2 xemas de ovo, bate e incorpora o puré de cabaza.

6. Mestura a fariña co resto de ingredientes e incorpora 80 g de pebidas de chocolate.

7. Fai bólas de masa do tamaño e da forma desexada e refrixera durante 30 minutos.

8. Quenta o forno a 180 ºC e coloca a masa nunha bandexa de forno con papel de forno para que non se peguen.

9. Enforna durante uns 12 ou 15 minutos. Saca e deixa arrefriar durante 5 minutos na bandexa de forno, logo retira e deixa arrefriar sobre unha táboa para servir.

Milkshake de cabaza, especias e caramelo

1. Asa 400 g de cabaza no forno quentado previamente a 180 ºC ata que estea branda.

2. Colócaa nun coador e escorre ata que perda toda a humidade. Deixa arrefriar.

3. Para o caramelo engade 25 g de manteiga, 100 g de nata para montar e 75 g de azucre nunha cazola pequena e ferve. Retira e deixa arrefriar.

4. Engade as especias: xenxibre en po, canela e noz moscada (un chisco de cada unha), así como media terrina de xeado de vainilla, a cabaza e 1 vaso de leite nun batedor. Bate ata que estea cremoso.

5. Engade o caramelo e a nata montada segundo vos guste. Esparexe as especias segundo vos guste.

Outras recomendacións

Suxerímosche unha receita máis: Crema de cabaza e lentellas.

Sabes que as Verduras conxeladas conservan todos os seus nutrientes e propiedades?

Se non probaches as sementes de chía, experimenta a súa riqueza nutritiva con estas receitas.