Gústache cociñar con Quinoa? Nos últimos anos, este alimento gañou popularidade, o seu uso en diferentes receitas é cada vez máis frecuente. As razóns? A súa versatilidade e os numerosos beneficios que ten para a nosa saúde.

Aínda que se consome como un gran, en realidade a Quinoa é unha semente que conquistou tantos padais grazas ao seu sabor único, cun lixeiro toque a noz e unha textura lixeira e esponxosa.

Sabes que este alimento destaca por ser unha das fontes vexetais máis ricas en proteínas? Por iso, é ideal para todo tipo de dietas, incluídas as vexetarianas e veganas. Ademais, tamén é apta para persoas celíacas, como alternativa aos cereais tradicionais, xa que é naturalmente libre de glute.

Por outra parte, a quinoa é unha excelente fonte de fibra, polo que favorece a dixestión, e é rica en vitamina B.

Podes consumir quinoa tanto no almorzo como no xantar ou na cea, é ideal en sopas, pratos principais e ensaladas. Para que aproveites ao máximo as súas vantaxes e o seu exquisito sabor, suxerímosche tres receitas con este marabilloso ingrediente. Non as perdas!

Modo de uso

• Recoméndase lavar a quinoa previamente con abundante auga.
• Pon a ferver tres partes de auga e engade unha parte de quinoa.
• Coce segundo vos guste (aproximadamente 10 minutos).

3 receitas con Quinoa (para 2 persoas)

Granola de quinoa, noces e cacao

1. Remolla 200 g de quinoa durante 2 horas en abundante auga. Cóaa, sécaa con papel de cociña e esténdea sobre unha bandexa con papel vexetal.

2. Métea no forno durante uns 20 minutos a 160 ºC, máis ou menos ata que a quinoa quede seca e crocante.

3. Pon a ferver 1 cullerada de azucre moreno coa auga durante 1 minuto.

4. Mestura todos os ingredientes moi ben: a quinoa enfornada, 200 g de copos de avea, 150 g de améndoas laminadas, outros 150 g de noces picadas, 1 cullerada de cacao puro, 30 g de aceite de coco, 1 culleradiña de sal e o xarope de azucre que preparamos.

5. Coloca o conxunto nunha bandexa de forno forrada con papel vexetal e méteo no forno durante 20 ou 30 minutos.

6. Dálle a volta á granola e métea no forno de novo outros 20 minutos para que torre por todas as partes.

7. En canto estea lista, retíraa do forno, coloca papel vexetal por enriba e preme lixeiramente a granola.

8. Deixa que arrefríe e a gozar!

Risoto de quinoa con cogomelos

1. Nunha tixola, rustre ½ cebola doce e 2 dentes de allo picados finamente cun fío de aceite. Agrega 200 g de refogado de cogomelos conxelado e refoga durante uns 5 minutos, deixando que os cogomelos liberen a súa auga.

2. Engade 1 culleradiña de tomiño e 250 g de quinoa previamente lavada. Mestura a lume medio.

3. Agrega 50 g de salsa de soia e inmediatamente 100 ml de viño branco (aprox. 1 vaso). Deixa evaporar 2 minutos.

4. En canto vaia secando a quinoa, vai engadindo 1 litro de auga pouco a pouco, removendo e deixando cociñar.

5. Cando a quinoa estea cocida, retira do lume e engade 50 g de manteiga e outros 50 g de queixo grana padano relado, mentres aínda estea quente.

6. Mestura moi ben, revolvendo para crear unha quinoa moi cremosa.

7. Mentres repousa, engade un chorriño de aceite de oliva nunha tixola e deixa que queza ben. Engade 200 g da mestura intensa de cogomelos frescos e refoga.

8. Mestura a metade destes cogomelos coa quinoa e o resto déixao para decorar por enriba.

9. Sirve enseguida e esparexe máis grana padano relado segundo vos guste.

Tabulé de quinoa

1. Coce 150 g de quinoa en 450 ml de auga cun chisco de sal ata que estea ben cocida. Escorre e arrefría.

2. Nun cunco coloca uns 50 ml de aceite, 1 dente de allo moi machucado, o zume e a reladura de 1 limón e un chisco de sal.

3. Pica fino un pouquiño perexil e herba hortelá. Corta 1 cogombro lavado en cubos e 150 g de tomates cereixa en cuartos.

4. Mestura a quinoa coas verduras e coas herbas.

5. Agrega o aderezo de limón e mestura moi ben. Sirve frío.

Outras recomendacións

Descubre toda a nosa proposta de produtos sen glute aptos para persoas celíacas.

Dámosche unhas boas ideas de consumo con Tahini, a pasta de sementes de sésamo procedente de Oriente Medio.

Queres coñecer 5 deliciosas receitas con sementes de chía?