Como preparas as túas tortillas de trigo? Ideal para un xantar ou cea informal, este produto tan sinxelo é moito máis versátil do que parece.
A continuación, dámosche 4 ideas orixinais que che abrirán outras posibilidades máis alá da típica preparación en forma de fajita ou burrito. Presentacións e elaboracións diferentes coas que vas sorprender aos teus invitados.
Suxerímosche tamén os ingredientes para o recheo en cada caso, aínda que sempre podes decidilo ao teu gusto. Queres coñecer estas 4 receitas diferentes con tortillas de trigo? Alá van!
Conos para reencher
Dálle unha forma atractiva, sinxela e moi fácil de reencher ás túas tortillas de trigo. Basta con que o cortes dende o centro ata un extremo e o enroles como un cono
Ingredientes para 2 persoas
- 4 tortillas.
- 1 aguacate.
- 1 lima.
- 100 g de salmón afumado.
- Ceboliño
Preparación
1. Coloca a tortilla sobre unha táboa, córtaa dende o centro ata un extremo e enrólaa en forma de cono. Fixa as capas cun escarvadentes. Repite o proceso con todas as tortillas.
2. Coloca os conos boca abaixo nunha bandexa e méteos no forno a 180º durante 10 minutos ata douralos lixeiramente.
3. Pela o aguacate e machúcao cun garfo ata formar unha crema. Salga e mestura co zume de lima.
4. Reenche coa crema de aguacate, os tacos de salmón afumado e esparexe co ceboliño picado.
Nachos para dipear
Converte as túas tortillas de trigo nuns saborosos nachos preparados para dipear. Sigue o paso a paso.
Ingredientes para 2 persoas
- 2 ou 3 tortillas.
- Guacamole 95 % de aguacate fresco.
Preparación
- Coloca 2 ou 3 tortillas unhas enriba das outras e córtaas en forma de triángulos (ou outra forma divertida que se che ocorra).
- Colócaos nunha bandexa de forno con papel vexetal e píntaos con aceite de oliva.
- Mete no forno durante 6 minutos a 180º.
- Acompáñaos co noso guacamole ou co que ti prefiras.
Barquiñas para gozar
Outra elaboración orixinal para reencher cos teus sabores favoritos e con absoluta comodidade. Só necesitas uns cuncos de cristal aptos para forno para conseguir a forma desexada. É moi fácil!
Ingredientes para 4 persoas
- 150 g mestura de brotes tenros.
- 4 tortillas.
- 1 lata de millo.
- 8 tomates cereixa.
- 1 cenoria.
- 2 cogombriños.
- 8 láminas de ventrecha.
Preparación
1. Coloca as tortillas nun recipiente apto para forno para que adopte a forma de cesta ou barquiña.
2. Méteas no forno a 180 ºC durante 10 minutos.
3. Deixa temperar as cestas e enche con abundante mestura de brotes.
4. Coroa a ensalada con millo, tomates cereixa, cenoria relada, cogombriños en rodas e 2 láminas de ventrecha.
5. Sazona e adereza segundo vos guste antes de consumir.
Tacos crocantes
Para conseguir uns tacos ben crocantes propoñémosche utilizar as nosas minitortillas de trigo. Colócaas boca abaixo na reixa do forno. Explicámoscho a continuación.
Ingredientes para 4 persoas
- 500 g de faceira de porco.
- 1 cebola doce.
- 2 cenorias.
- 1 porro.
- 5 g de xenxibre.
- 1 culleradiña de sobremesa de comiño en po.
- 3 allos.
- 1 caiena enteira.
- 1 lima.
- 2 tomates cereixa.
- 250 ml de viño tinto.
- 250 ml de auga.
- 2 culleradas sopeiras de fabas vermellas.
- 4 minitortillas.
- 4 tomates cereixa.
- 1 ravo.
- Queixo mozzarella relado.
- Coandro.
- Lima.
Preparación
Para a carne:
1. Salpementa as faceiras.
2. Nunha pota para guisar, dóuraas cun pouco aceite a lume forte. Resérvaas.
3. Refoga na pota a cenoria, a cebola, o porro, a caiena, os allos e o xenxibre. Todo lavado, sen pelar demasiado e cortado sen ser moi fino.
4. Engade unha culleradiña de sobremesa de comiño en po, as peladuras da lima e refoga uns minutos.
5. Incorpora os tomates cortados en cubos grosos.
6. Remove un par de minutos e agrega a carne e os seus zumes. Verte un vaso de viño tinto e sube a intensidade do lume para que evapore o alcohol.
7. Engade un vaso de auga e tapa a pota: cunha exprés, cociña 30 minutos; en pota convencional 1h e 30 minutos.
8. Deixa temperar o guiso e desfebra as faceiras.
9. Tritura todo o que queda na pota e pásao por un coador. Bótao nunha pota limpa e deixa reducir a lume medio 5 ou 10 minutos, ata obter unha textura espesa.
10. Mestura a carne coa salsa espesada xunto ás fabas vermellas e reserva.
Para as tortillas:
1. Coloca as tortillas nunha reixa para forno en forma de taco, boca abaixo, e mete no forno 7 minutos a 180º.
2. Enche os tacos coa carne desfebrada e completa con cebola doce cortada á xuliana fina, tomates cereixa cortados en cuartos, ravos laminados e queixo mozzarella relado.
3. Sirve no prato e termina con coandro acabado de picar e unha cortada de lima.
Outras recomendacións
Se prefires as Tortillas de trigo 100 % integrais, propoñémosche outras tres receitas.
E non perdas esta Receita de Tacos de atún con aguacate, elaborada coas nosas minitortillas de trigo.
Se aínda non probaches a Piadina, descubrímosche as súas mellores formas de consumo.
Apetéceche o noso Recheo de Kebab para as túas tortillas? Carne de polo asado saborosa e xenuína, próbaa!