Mercadona iniciou a súa colaboración co comedor social, xestionado pola Asociación Estrellas & Duendes en Palma, mediante a entrega diaria de produtos de primeira necesidade como froitas e verduras, lácteos, carne, peixe, embutidos, conservas, pan ou pastas co obxectivo de que os comedores poidan preparar as comidas dos nenos, das nenas e das súas familias, usuarias do centro.

O comedor social, aberto dende hai catro anos e xestionado pola Asociación Estrellas & Duendes en Palma, atende diariamente arredor de 62 nenos, nenas e as súas familias con máis de 98 servizos ao día repartidos entre o almorzo, a comida e a merenda (segundo sexa período lectivo ou non).

A doazón realízase á primeira hora da mañá, de luns a venres, grazas aos recursos loxísticos e humanos de Mercadona. Os traballadores da tenda, Lucas Albacete e José Miguel Rivera, son os encargados de achegar ata o comedor os produtos coa furgoneta da compañía, e entréganos para que os voluntarios do centro preparen as comidas.

A responsable de Relacións Externas de Mercadona en Illes Balears, Bárbara Ordás, asegura que “estamos moi satisfeitos de colaborar con este comedor social, e sentímonos orgullosos de poder achegar alimentos para axudar a completar a dieta dos nenos, nenas e familias que acoden a este centro".

Pola súa parte, o representante da Asociación Estrellas & Duendes de Palma, Miguel Ángel Colom manifestou a súa satisfacción por este tipo de colaboracións "que nos axudan a aumentar os nosos recursos diarios con produtos de primeira necesidade”.

Mercadona colabora en Illes Balears, coa doazón de 109 toneladas de alimentos o pasado exercicio, co Banco de Alimentos de Mallorca, os Bancos Municipais de Maó e Ciutadella en Menorca, con Cáritas Diocesana de Eivissa e Formentera, co Comedor Social de Inca xestionado por Cáritas Diocesana de Mallorca, co Comedor Social de "Ca l'Ardiaca" xestionado pola Asociación Altruísta Es Refugi de Palma, co Comedor Social Tardor xestionado pola Asociación Tardor de Palma e cos comedores sociais de Eivissa, Santa Eulària des Riu e Sant Antoni de Portmany xestionados por Cáritas Diocesana de Eivissa e Formentera en Eivissa. Ademais, tamén colabora coa participación de supermercados en accións benéficas como as "Operacións Quilo" ou as campañas como a “Gran Recollida” organizadas polo Banco de Alimentos de Mallorca.

Unha política de acción social sostible integrada na estratexia de RSE de Mercadona

Un dos compromisos que Mercadona mantén coa sociedade é devolver parte de canto recibe dela. Co devandito obxectivo desenvólvese o Plan de Responsabilidade Social da compañía, que atende o compoñente social e ético a través de distintas liñas de actuación sostibles que reforzan a súa aposta polo crecemento compartido. Como parte desta política, Mercadona colabora con máis de 170 comedores sociais e 60 Bancos de Alimentos e outras entidades benéficas de toda España, ás que doou 8.300 toneladas de alimentos, o equivalente a 140.000 carros de compra, en 2018. Igualmente, traballa con máis de 33 fundacións e centros ocupacionais na decoración das súas tendas con murais de trencadís, elaborados por máis de 1.000 persoas con discapacidade intelectual

Outra liña estratéxica do Plan de Responsabilidade Social de Mercadona é a sostibilidade medioambiental. Para iso, Mercadona conta cun Sistema de Xestión Ambiental propio, enfocado á optimización loxística, á eficiencia enerxética e á redución de residuos; parte deste sistema está baseado nos principios da Economía Circular e busca conxuntamente cos provedores totaler a conversión dos residuos en novos recursos.

Así mesmo, Mercadona traballa no Proxecto de Distribución Urbana Sostible e na mellora da calidade do aire nas nosas cidades mediante camións e furgonetas propulsados por tecnoloxías máis limpas e eficientes, así como na construción de cubertas axardinadas e xardíns verticais nas súas tendas.

Mercadona é dende 2009 membro do Foro Europeo da Distribución para a Sostibilidade (REAP), un organismo copresidido pola Comisión Europea no que todos os seus participantes son auditados periódica e externamente en materia de sostibilidade. Ademais, está adherida dende o ano 2011 ao Pacto Mundial das Nacións Unidas pola defensa dos valores fundamentais en materia de Dereitos Humanos, Normas Laborais, Medio Ambiente e Loita contra a Corrupción.