Mercadona quere dar resposta, nesta situación excepcional, ás necesidades da Sociedade e dos seus “Xefes”.
- Este novo almacén destinado exclusivamente ao servizo en liña, denominado internamente Colmea e situado en Getafe, dará servizos nunha primeira fase aos barrios de Retiro, Salamanca e á zona de Méndez Álvaro.
- Dende o inicio do confinamento, Mercadona reforzou o seu servizo en liña en Valencia e Barcelona, cidades onde conta con Colmeas, e suspendeuno temporalmente no resto dos lugares onde se servían os pedidos directamente dende as tendas.
- Cun investimento de 12 millóns de euros, o novo almacén en liña conta cun cadro de persoal inicial de 100 persoas, que crecerá conforme evolucione o proxecto ata superar as 350 persoas.
Mercadona, compañía de supermercados físicos e de venda en liña, puxo en marcha hoxe a súa primeira Colmea en Madrid tras acelerar os seus esforzos para dar resposta ás necesidades actuais dos seus “Xefes” e da sociedade, nunha situación excepcional como a que estamos vivindo no país. Tras reforzar o servizo en liña en Valencia e Barcelona debido á alta demanda, Madrid é a seguinte cidade en dispoñer do novo servizo.
A primeira Colmea de Mercadona en Madrid está situada en Getafe (Polígono Los Gavilanes). Dende hoxe, dá servizo aos barrios de Retiro e Salamanca e á zona de Méndez Álvaro, concretamente a sete códigos postais (28001, 28006, 28007, 28009, 28010, 28014 e 28045). Nas próximas semanas, a medida que se vaia consolidando a posta en marcha e o máis rápido posible, ampliarase o servizo a novos códigos postais da cidade, aínda que non hai datas concretas das novas fases de expansión.
Na Colmea de Madrid traballan actualmente 100 persoas e en función do crecemento irá aumentando o cadro de persoal ata os 350 traballadores. Este centro de preparación será exclusivo para a canle en liña, que nun momento como o actual representa unha clara alternativa para moitos dos nosos Xefes. Todos os traballadores contan con todos os medios de protección indicados polas autoridades sanitarias e preparan e reparten extremando ao máximo as precaucións recomendadas.
Segundo Juana Roig, directora xeral do proxecto de compra en liña de Mercadona, “decidimos lanzar o novo servizo en liña en Madrid, pese á situación excepcional e delicada pola que todos estamos pasando, porque agora máis que nunca os nosos clientes estano reclamando. Dándolle prioridade sempre á seguridade e saúde dos nosos traballadores, as empresas debemos ser motor fundamental para reactivar a economía e isto é unha mostra máis do noso compromiso co país”. Juana Roig tamén quixo agradecerlles ás persoas que participaron no proxecto e sinala que “somos conscientes de que non imos poder dar servizo a toda a demanda de Madrid, pero ímonos esforzar ao máximo para chegar ao maior número de clientes o máis pronto posible. O noso obxectivo é levar a compra a 30.000 fogares no próximo mes”.
Creación de emprego e investimento
O proxecto en liña en Madrid é a terceira Colmea que inaugura a compañía, tras a posta en marcha da de Valencia, en 2018; e da de Barcelona, en 2019. O cadro de persoal de Mercadona Online ascenderá a 1.000 persoas este ano.
Este novo centro de distribución supuxo un investimento de 12 millóns de euros e ten unha superficie de 15.000 m2, dos que 3.800 m2 están destinados a produtos frescos, incluída unha área de almacenamento en frío para produtos refrixerados e conxelados. Os produtos frescos recíbense e prepáranse o mesmo día de entrega ao cliente, polo que se garante a máxima calidade e frescura.
Sostibilidade e eficiencia
Mercadona conta cunha flota de 50 vehículos a gas que poden transportar ata 15 pedidos. Estes foron deseñados exclusivamente con 3 zonas de temperatura adaptadas a cada tipo de produto: temperatura ambiente, refrixerado e conxelado. Ademais, incorpora un sistema de descarga mecanizado que minimiza a manipulación da carga, coa redución conseguinte de sobreesforzos para os traballadores e a diminución do tempo de descarga. Así mesmo, toda a flota forma parte do proxecto de transporte sostible que está desenvolvendo a compañía, xa que todos os vehículos están propulsados a gas, seguindo o compromiso co medio ambiente da empresa.
O obxectivo da nova compra en liña non se basea unicamente na mellora da experiencia de compra pola nova web e a aplicación móbil, senón que leva asociados importantes cambios estruturais que permiten optimizar os procesos de preparación e repartición. Ao trasladar a preparación e o envío dos pedidos á Colmea, en lugar de xestionalos un a un dende as tendas, increméntase a produtividade e eficiencia, garantindo un mellor servizo. Ademais da tenda en liña, todo o software utilizado nos diferentes procesos está desenvolvido internamente por Mercadona, que conta cun equipo de máis de 60 persoas entre desenvolvedores, product managers e deseñadores.
Este novo modelo mantén a mesma tarifa que o servizo anterior (7,21€ / pedido) e amplía o horario de entrega de 7:00 a 22:00 horas de luns a sábado en tramos de 1 hora a partir do día seguinte de facer o pedido.
Os produtos pódense localizar a través das categorías ou do buscador da nova plataforma dispoñendo de fotografías de cada produto e toda a súa información relevante.
Enlaces de interese:
- Web: www.mercadona.es
Almacén de Mercadona Online en Getafe (Madrid).
Almacén de servizo Mercadona Online en Getafe (Madrid).
Traballador do almacén en liña de Mercadona en Getafe.