Mercadona, empresa de supermercados físicos e de venda en liña, comezou o traslado dun primeiro grupo de 250 traballadores ás súas novas oficinas situadas en Albalat dels Sorells (Valencia), un movemento que culminará a finais de 2025 coa colocación definitiva de 2.600 persoas nun novo espazo de traballo máis sostible e que fomenta a colaboración.

Ao longo dos próximos tres anos, os traballadores, que actualmente desempeñan a súa actividade en diferentes centros situados noutros municipios valencianos como Paterna e Tavernes, incorporaranse de forma progresiva a estas novas e innovadoras instalacións nas que a compañía ten previsto investir un total de 200 millóns de euros distribuídos nas tres fases do proxecto.

A primeira fase do proxecto de Albalat dels Sorells comezou en 2014 coa inauguración do seu Centro de Procesos de Datos (CPD) e do de Servizos, cun investimento de 45 millóns de euros. A segunda fase iniciouse en 2018 co investimento duns 100 millóns de euros na posta en marcha da construción destas novas oficinas que empezan agora a recibir traballadores e que se prevé que finalice en 2024. E a fase 3, cun investimento aproximado de 55 millóns de euros, está previsto que se inicie o próximo ano ata 2025, centrada na construción e posta en marcha dun novo Centro de Coinnovación.

Un proxecto innovador, dixital e que fomenta a colaboración

As novas oficinas, cuxo deseño está a cargo do estudio ERRE Arquitectura, representan unha oportunidade para seguir avanzando na dixitalización da compañía, ao tempo que fomentan a colaboración, a creatividade e o intercambio de coñecemento entre as distintas partes do proceso, favorecendo a execución e a axilidade na toma de decisións.

Pensadas á medida das necesidades e experiencia dos traballadores, deseñáronse ata 15 tipoloxías de ambientes distintos que cada traballador poderá elixir en función da tarefa que teña que desempeñar cada día. Con esta nova fisionomía pásase do modelo tradicional de despachos ao de espazos abertos, moito máis colaborativo e creativo. Déixase de traballar por departamentos e apóstase por traballar por “barrios” (áreas cuxos traballadores comparten un mesmo proceso independentemente do departamento ao que pertenzan). Para a definición da nova forma de traballar contouse co provedor especialista BICG.

Ademais, o edificio está dotado de solucións tecnolóxicas innovadoras, como un sistema áxil de proxección sen fíos para compartir información ou o control de distintos espazos ou servizos a través dunha aplicación móbil. 

Ademais, os traballadores dispoñerán de mellores servizos comúns como un amplo e funcional comedor cunha oferta gastronómica variada, saudable e de calidade. E o Kiosko Hacendado, unha área de venda automática cunha selección da oferta existente nos supermercados. Igualmente, una vez acabada a Fase 2, Albalat contará cun aparcadoiro propio para o cadro de persoal.

Unha clara aposta pola sostibilidade e a calidade de vida no Traballo

Mercadona, na súa aposta polo respecto ao medio ambiente, introduciu importantes melloras nestas novas oficinas, o que reforzará aínda máis o seu compromiso coa sostibilidade. Así, as novas oficinas contarán con grandes patios axardinados internos e unha orientación leste-oeste, o que non só xera un aproveitamento máximo da luz solar e unha redución do consumo eléctrico, senón que redunda nun maior confort dos usuarios e contribúe a absorber a contaminación e producir osíxeno.

A compañía, ademais, está utilizando materiais de produción local, é dicir, de quilómetro 0, o que reduce ao máximo a súa pegada de carbono. O proxecto conta cunha instalación de 380 placas fotovoltaicas e un sistema de xestión intelixente do edificio para garantir o uso eficiente e racional dos recursos.

Á súa vez, a compañía incorporará solucións de mobilidade sostible para o conxunto do cadro de persoal que desenvolva a súa actividade en Albalat dels Sorells en colaboración co programa de aceleración de Lanzadera, como o fomento do uso do coche particular compartido, a través do provedor HoopCarpool; o uso da bicicleta, coa colaboración de Kleta; ou dun servizo de autobús de empresa, que proporcionará BusUp. Ademais, as novas instalacións contarán cun aparcadoiro de vehículos eléctricos (con prazas de recarga no soto), patinetes e bicicletas.

Interior das novas oficinas de Mercadona situadas en Albalat dels Sorells (Valencia).

Proposta do proxecto coa Fase 3 simulada.

Vista aérea das novas oficinas de Mercadona en Albalat dels Sorells (Valencia).

Imaxe de cabeceira: Vista aérea das novas oficinas de Mercadona en Albalat dels Sorells (Valencia).