- Cun investimento inicial de 7 millóns de euros, Huevos Guillén xa iniciou o proceso de transformación das súas instalacións.
- Actualmente encóntranse dispoñibles en 59 supermercados de Mercadona en Valencia e mais en Alacante e, a final de ano, teranse incorporado en máis de 180 tendas.
- Mercadona comprométese a que no 2023, dous anos antes do previsto, todos os ovos comercializados sexan de galiñas non criadas en gaiola.
Huevos Guillén, empresa produtora de ovo fresco e mais de ovoprodutos, serviulle esta semana á cadea de supermercados Mercadona, compañía da que é interfornecedora especialista, os seus primeiros ovos procedentes de galiñas criadas no chan.
Grazas a iso, desde o 3 de abril un total de 59 supermercados de Mercadona, situados nas provincias de Valencia e mais de Alacante, dispoñen de ovos de galiñas non criadas en gaiola nos seus andeis, marcados cos códigos 1 e 2, é dicir, campeiras e criadas no chan respectivamente. Mercadona e os seus fornecedores teñen previsto incrementar progresivamente a produción e a venda deste tipo de ovos ao longo do ano, até pechar o 2018 en máis de 180 supermercados.
Para abordar este novo reto, a compañía e os fornecedores de ovo de Mercadona, en concreto Huevos Guillén, ten previsto investir un total de 60 millóns de euros, que lle permitirán pór a funcionar novas instalacións e naves para garantir a crianza das súas galiñas no chan e mais campeiras.
No 2023 Mercadona, dous anos antes do previsto, terá á venda unicamente ovos procedentes de galiñas non criadas en gaiolas. Esta medida, tal e como indicou Margarita Muñoz, directora de Responsabilidade Social de Mercadona, “é parte do firme compromiso social de Mercadona, manifestado entre outras moitas accións a través da súa Política de Benestar Animal, que foi ratificada por todos os seus fornecedores e está dispoñible na web corporativa da compañía”.
Alén diso, Mercadona mantivo conversas coa organización internacional Igualdade Animal para a informar do proceso de implementación. Nese sentido Javier Moreno, director de Igualdade Animal, destacou que o anuncio da compañía “de rebaixar a data ao 2023 para deixar de vender ovos de galiñas en gaiola, supón un grande avance para mellorar o benestar animal e mais as condicións das galiñas. Este compromiso será moi importante para todo o sector e hoxe podemos dicir, sen dúbida, que o fin das gaiolas para galiñas en España está máis preto”.
Cartel en español:
Cartel fixado nos 59 supermercados de Valencia e mais de Alacante para informar os “xefes” (clientes) da medida.
Imaxe de cabeceira: Galiñas criadas no chan nas instalacións do interfornecedor Huevos Guillén.