•  Esta tenda en Huelva Puerto reabre após unha reforma integral cun investimento de 2,1 millóns de euros e a participación de 25 fornecedores, que deron emprego a máis de 124 persoas durante a fase de reforma.
•  Este novo supermercado, completamente conectado tecnoloxicamente, presenta un deseño e unhas seccións totalmente renovadas que melloran a experiencia total de compra dos clientes, cun aforro enerxético de até un 40% respecto dunha tenda tradicional.
•  As compras de Mercadona na provincia de Huelva aumentan un 8%, até os 248 millóns de euros.

Mercadona reabre hoxe un supermercado en Huelva, concretamente na Avda. Molino de la Vega, após unha reforma integral para o adaptar ao novo Modelo de Tenda Eficiente da compañía, cun investimento de 2,1 millóns de euros e a participación de 25 fornecedores que deron emprego a 124 persoas durante a fase de reforma. O novo supermercado presenta un deseño que mellora a distribución, a decoración e a disposición de todas as seccións co obxectivo de mellorar e optimizar a experiencia de compra dos seus "Xefes", como a compañía denomina internamente os seus clientes.

A nova tenda eficiente de Mercadona en Huelva conta cunha superficie de sala de vendas de 1.756 metros cadrados e dispón dun deseño totalmente renovado respecto do anterior modelo de tenda, con novas cores e materiais quer na fachada exterior de acceso ao supermercado quer na distribución das diferentes seccións. Aposta por amplos espazos diáfanos que facilitan a entrada de luz natural e cores cálidas na delimitación dos diferentes ambientes.

Novidades en todas as seccións

Ademais, presenta novidades en todas as seccións das cales se benefician tanto os “Xefes” (clientes) como os traballadores, os fornecedores e a sociedade. Por exemplo, dispón dunha nova entrada con duplo acristalado que evita correntes de aire, de andeis específicos para o leite fresco e para os zumes refrixerados, dunha máquina de zume de laranxa acabado de espremer, dun novo punto de acabado para a carne, dunha góndola central na perfumería para a cosmética especializada e dunha nova exposición na peixería para os produtos de cuncha, entre outras novidades.

Este novo Modelo de Tenda Eficiente de Mercadona tamén procura ofrecer un mellor servizo para facilitar o acto de compra dos clientes mediante a ampliación dos corredores da froita e dos vexetais, dun novo modelo de cesta da compra e de dous modelos de carros, moito máis ergonómicos e lixeiros.

Adicionalmente, de maneira a facilitar as tarefas cotiás dos traballadores, este novo supermercado inclúe múltiples medidas para mellorar a ergonomía e eliminar os sobreesforzos. Para o deseño do novo moble de caixa, Mercadona contou coa colaboración do Instituto de Biomecánica de Valencia. Para alén de dispor de zonas comúns para que os empregados gocen dunha maior comodidade nos seus momentos de lecer, así como dunha zona comedor máis equipada e duns armarios persoais máis amplos e cómodos.

Aforro enerxético e xestión totalmente informatizada: tenda eco-eficiente

A nivel medioambiental, tomáronse medidas que permiten reducir até nun 40% o consumo enerxético respecto do modelo de tenda convencional, por mor da mellora do illamento térmico e acústico, optimizando os materiais e o grosor de paredes e teitos e con novas arcas de conxelado máis eficientes enerxeticamente e respectuosas co medioambiente. Ademais, conta cun sistema de iluminación LED automatizado que se regula segundo as zonas e os momentos do día, para unha xestión enerxética moito máis eficiente.

Do mesmo xeito, este novo Modelo de Tenda de Mercadona, completamente conectada tecnoloxicamente, integra unha serie de dispositivos electrónicos e de ferramentas colaborativas para os traballadores, cos que poderen compartir información desde calquera sección da tenda, facilitando a autoxestión de cada supermercado e axilizando os procesos de toda a cadena. Entre os novos dispositivos encóntranse, por exemplo, a liña de caixas, as balanzas ou o uso de tabletas electrónicas que substitúen o papel para realizar as xestións administrativas. Todo isto permite optimizar os procesos e coñecer a xestión da tenda en tempo real, facilitando a toma de decisións e contribuíndo a unha maior axilidade, especialmente, na xestión dos produtos frescos.

O horario de abertura do supermercado é de luns a sábado, de 9h00 a 21h30, e dispón dun aparcadoiro de 83 prazas cubertas e 95 exteriores para facilitar a compra a todos os clientes que se movan en vehículo privado. Alén diso, Mercadona habilitou o seu servizo a domicilio e a compra online.

Con esta nova abertura, os clientes de Mercadona beneficiaranse da súa coñecida política comercial S.P.B. (Sempre Prezos Baixos), que a compañía emprega de xeito exclusivo e que consiste en garantir o menor prezo unitario dos produtos, coa mellor calidade, de forma permanente. Grazas a isto, Mercadona pode ofrecerlles aos seus clientes unha variedade eficaz, con independencia de quen fabrique o produto, coa máxima calidade e ao mínimo prezo posible.

Mercadona ten previsto para o exercicio 2017 investir 180 millóns de euros en reformar e renovar con este novo Modelo de Tenda Eficiente 126 tendas espalladas por toda España, así como investir 5 millóns de euros en I+D+i en novas melloras informáticas.

Mercadona en Huelva: Balance 2016

Mercadona conta con 19 tendas e un cadro de persoal de 848 traballadores con emprego estable e de calidade en Huelva, provincia en que, durante o pasado exercicio, se crearon 33 novos postos de traballo. Mercadona non só recompensa o esforzo das súas traballadoras e traballadores cun soldo que se mantivo por riba da media do sector (o soldo mínimo bruto de entrada é de 1.297 euros/mes), senón que tamén comparte os beneficios obtidos por medio da súa política de retribución variable e, no seu compromiso co benestar dos traballadores, a compañía continuou a apostar pola conciliación familiar e laboral. No caso de Huelva, 31 nais traballadoras optaron en 2016 por alongar en 30 días os catro meses de baixa maternal establecidos legalmente.

Da mesma maneira, a aposta de Mercadona polo sector agroalimentario de Huelva volveu ser unha constante. O pasado exercicio, as compras da compañía a fornecedores de Huelva ascenderon a 248 millóns de euros, un 8% máis que no ano anterior. Respecto ao investimento dos fabricantes interfornecedores en Huelva, acadouse a cifra de 3,84 millóns de euros en 2016.