Para explicar a función dos cereais, os tubérculos e os legumes no penso seco das nosas mascotas, temos que facer referencia aos hidratos de carbono. Imos ver por que e explicar esta relación.

Que achegan os hidratos de carbono ao can e ao gato?

Os hidratos de carbono ou carbohidratos constitúen unha das tres categorías de macronutrientes (xunto ás proteínas e ás graxas) na dieta dos animais. Divídense, principalmente, en:

• os azucres,
• os amidóns e
• a fibra.

Os azucres e os amidóns son fontes de enerxía para o organismo, que poden ser dixeridas por cans e gatos, xa que ambos os dous dispoñen das encimas dixestivas necesarias para descompoñelos en unidades máis sinxelas que poidan ser absorbidas polo intestino delgado. Por este motivo, son elementos moi importantes incluídos nas dietas para cans e gatos.

Os cereais, os tubérculos e os legumes son as principais fontes de amidóns, que son os hidratos de carbono máis importantes que inclúen os alimentos para mascotas.

Pola súa parte, a fibra ten un efecto beneficioso para o sistema dixestivo dos animais. Unha vez que chega ao intestino groso, hai unha fracción que pode ser fermentada por bacterias intestinais para obter enerxía, promovendo o crecemento da microbiota intestinal beneficiosa que pode axudar a reducir o desenvolvemento de bacterias nocivas. Mentres, a parte non fermentable da fibra favorece que as deposicións sexan regulares, así como a consistencia das feces.

Ademais, as principais fontes de fibra e hidratos de carbono incluídas nos alimentos para mascotas tamén proporcionan importantes nutrientes esenciais como as vitaminas, os minerais e os ácidos graxos.

Poden provocar os cereais, tubérculos e legumes problemas de saúde en cans ou gatos?

Dende sempre, os cereais formaron parte da dieta natural de cans e gatos como fonte de hidratos de carbono. Nas súas orixes, estes mamíferos cazaban presas herbívoras que se alimentaban de grans de cereal. Polo tanto, cans e gatos xa inxerían cereais semidixeridos hai moito tempo.

Dende a domesticación por parte do home, estas mascotas foron adaptando progresivamente o seu metabolismo a alimentos que inclúen cereais, tubérculos e legumes, polo que o seu uso non supón ningún problema para a súa saúde e non existe ningunha contraindicación no consumo destes.

Tanto os cans como os gatos teñen un sistema dixestivo perfectamente adaptado para a dixestión e asimilación dos hidratos de carbono, e son capaces de dixerir o amidón cocido e descompoñelo en azucres como fonte de enerxía dispoñible.

En mascotas, non se encontrou unha asociación entre a inxestión de hidratos de carbono e o risco de padecer enfermidades como a “diabete mellitus”. Non obstante, a obesidade (ocasionada por un estilo de vida sedentario, por un consumo excesivo de alimento, esterilización…) si que está asociada coa aparición desta enfermidade.

Polo tanto, o ideal sería alimentar o noso can ou gato cun alimento completo e equilibrado, que inclúa hidratos de carbono achegados polos seus diferentes ingredientes como poden ser os cereais, tubérculos e legumes; e que se proporcione unha ración diaria do alimento acorde ás necesidades fisiolóxicas de cada animal (peso, idade, raza, actividade, etc.) para evitar sobrealimentalos.

Outras recomendacións

Alimentos completos e complementarios. Sigue a guía de alimentación da túa mascota.