Gústache coidarte nesta época do ano? É importante despois das festas do Nadal, cando normalmente baixamos un pouco a garda. Pouco a pouco, volvemos á rutina e recuperamos os bos hábitos.

Para axudarche no coidado da túa alimentación, presentámosche dúas novidades ricas en proteínas e baixas en graxas: Polo e Pescada ao natural. Teñen unha enorme versatilidade na cociña, xa que se poden preparar numerosas receitas fáciles e deliciosas. Toma nota das nosas suxestións:

Receitas con Polo ao natural

Ensalada de cóengos, millo, polo, aguacate, tomates cereixa e pipas

Ingredientes:

• 70 g de cóengos.
• 1 lata de Polo ao natural.
• 50 g de millo doce.
• 60 g de aguacate.
• ½ tomate en rama.
• 7 g de pipas naturais.
• 10 ml de vinagre balsámico de Módena.
• 40 ml de aceite de oliva virxe extra.

Modo de preparación:

• Prepara unha base de cóengos nun recipiente apropiado.
• Corta o tomate en dadiños pequenos e engádeo xunto ao millo e ao aguacate cortado en liscos finos.
• Esmiúza o Polo ao natural sobre a ensalada.
• Esparexe as pipas.
• Bota sal e pementa e aliña segundo vos guste con aceite e vinagre balsámico de Módena.

Arroz integral refogado con ovo e polo

Ingredientes:

• 1 vaso de arroz integral
• 1 ovo.
• ½ cebola vermella.
• 50 g de cenoria.
• 3 g de xenxibre.
• 40 ml de salsa de soia.
• 1 lata de Polo ao natural.
• Coandro segundo vos guste.
• Aceite de oliva virxe extra

Modo de preparación:

• Nun prato, reserva o xenxibre ben picado, a cebola vermella cortada á xuliana moi fina e a cenoria lista en bastóns finos.
• Nun wok ou tixola ampla, quenta dúas culleradas de aceite de oliva virxe extra. Engade o xenxibre ben picado. En canto o xenxibre baile, engade o ovo previamente batido. Fai bailar a tixola para que o ovo non se pegue. Antes de que calle o ovo por completo, engade o arroz integral e esparéxeo ben na tixola. Remove con enerxía e refoga sempre que se poida, de maneira que o ovo e o arroz comecen a integrarse ben.
• Engade a cenoria e a cebola vermella, ambas as dúas cortadas en tiras. Refoga o conxunto a lume intenso un par de minutos.
• Engade o Polo ao natural e sigue refogando e removendo con enerxía.
• En canto o arroz estea listo e a cebola e a cenoria empecen a cociñarse, pero sigan al dente, engade a salsa de soia polos bordos da tixola. Nunca deixes de remover e refogar.
• Sirve nun prato e culmina con coandro picado segundo vos guste.

Pasta con polo, cereixas, allo e chile

Ingredientes:

• 200 g de espirais.
• 15 tomates cereixa.
• 2 dentes de allo.
• 1 chile.
• 1 lata de Polo ao natural.
• 1 cullerada de ourego.
• 3 culleradas de aceite de oliva.
• Pementa negra segundo vos guste.
• Queixo relado (opcional)

Modo de preparación:

• Ferve auga nunha pota ampla. Salga xenerosamente e engade a pasta. Coce dous minutos menos do tempo que indica o fabricante, xa que se terminarán de cociñar na tixola.
• Nunha tixola ampla, refoga os allos picados finamente no aceite de oliva virxe extra e seguidamente engade o chile. Cando empecen a dourar, engade os tomates cereixa lavados cunha lixeira incisión de coitelo na pel. Refoga na tixola ata que os tomates comecen a engurrar.
• Engade a lata completa de Polo ao natural e xunta co rustrido. Engade á mesma tixola as espirais e remove con enerxía, buscando que se mesture ben o conxunto.
• Engade á tixola dous culleróns da auga onde se coceu a pasta. Refoga e remove con enerxía: o amidón da pasta e a auga de cocción irán evaporando e daranlle cremosidade ao conxunto. Engade o ourego e dálle a última volta.
• Cando a pasta estea lista, sirve no prato. Pódese terminar o prato con pementa negra acabada de moer, queixo relado e/ou máis Polo ao natural.

Receitas con Pescada ao natural

Pescada en salsa verde rápida

Ingredientes para a masa:

• 4 latas de pescada ao natura

Ingredientes:

• 4 latas de Pescada ao natural.
• 2 dentes de allo.
• 1/2 cebola doce.
• 150 ml de viño branco.
• 70 g de chícharos conxelados.
• 15 g folliñas de perexil.
• 1 culleradiña de fariña fina de millo.
• Sal en escamas
• Pementa negra

Modo de preparación:

• Rustre o allo e a cebola picados en anaquiños moi pequenos.
• Engade a fariña de millo e disólvea no rustrido.
• Incorpora o viño branco e espera uns minutos a que evapore o alcohol.
• Engade o caldo da propia conserva de pescada, o perexil picado e os chícharos conxelados e deixa que ferva.
• Na propia salsa, quenta a pescada. Sirve no prato coroando con sal en escamas e pementa acabada de moer.

Focaccia integral con pescada

Ingredientes para a masa:

• 450 g de fariña integral.
• 380 g de auga.
• 25 g de lévedo fresco.
• 5 g de mel.
• Aceite de oliva virxe extra.
• 1 culleradiña de ourego.
• 4 g de sal.
• 80 g de cabaciña.
• ½ cebola.
• 10 o 12 tomates cereixa.
• ½ lata de Pescada ao natural.

Modo de preparación:

• Nun recipiente amplo (a masa vai crecer), mesturar a fariña integral, a auga e o lévedo. Engade o mel, o sal e amasa coas mans (ou un robot ou amasadora) ata obter unha bola de masa suave e elástica.
• Cubre a masa con plástico transparente e deixa fermentar no forno apagado, arredor dunha hora. Transcorrido ese tempo, traballa no mesmo recipiente a masa, axudados dunha lingua, con movementos envolventes para facilitar a incorporación de aire. Tapa a masa cun trapo e déixao no forno outras 2 horas.
• Terminada a segunda fermentación, verte a masa sobre unha bandexa para forno forrada con papel e, cos dedos mollados en aceite, traballa lixeiramente a superficie da masa. É o momento de introducir as verduras na superficie da masa: cabaciña cortada en rodas, tomates cereixa cortados pola metade, cebola cortada finamente.
• Rega a focaccia lixeiramente con sal, aceite e ourego e métea no forno, quentado previamente a 180 ^oC, durante 20-25 minutos.
• Unha vez lista a focaccia, esmiuzamos a pescada e regamos de novo, lixeiramente, con aceite, sal e ourego.

Ensalada temperada de pataca con pescada

Ingredientes:

• 200 g de pataca.
• 1 tomate en rama.
• 25 g de améndoas torradas.
• 1 ovo.
• ½ lata de Pescada ao natural.
• 20 g de cebola vermella.
• Ceboliño ao gusto.
• Vinagre de mazá.
• Aceite de oliva virxe extra.

Modo de preparación:

• Coce as patacas coa súa propia pel en auga con sal, ata que estean cocidas (uns 30 minutos). Reserva.
• Corta a cebola vermella moi fina con coitelo ou mandolina e reserva en auga con xeo para que perda forza.
• Coce o ovo en abundante auga salgada (podemos utilizar ovos xa cocidos).
• Nun morteiro, tritura as améndoas torradas e incorpora o tomate pelado lixeiramente cortado en anacos. Sigue triturando e engade aceite e vinagre de mazá segundo vos guste para despois aliñar.
• Pela e corta as patacas aínda temperadas en rodas. Monta a ensalada cunha base de patacas, o ovo cocido cortado, a Pescada ao natural esmiuzada e, finalmente, aliña co machucado de améndoa e tomate.
• Coroa coa cebola morada e esparexe ceboliño acabado de picar.

Outras recomendacións

Tamén podes coidar os teus almorzos e as túas merendas con estas receitas con Cereais Avea Crunchy.