Sección de forno dun novo supermercado eficiente de Mercadona

Cidade Real – Mercadona inaugura unha nova tenda eficiente en Puertollano

11 de decembro de 2017
  • Esta nova tenda, completamente conectada tecnoloxicamente, presenta un deseño e unhas seccións totalmente renovadas que melloran a experiencia total de compra dos clientes, cun aforro enerxético de até un 40% respecto dunha tenda tradicional.
  • O novo supermercado eficiente supuxo un investimento de 2,3 millóns de euros e conta cun cadro de persoal de 44 traballadores con emprego estable e de calidade. Esta abertura supón o peche do supermercado que Mercadona tiña na rúa Torrecilla desta localidade.
  • Na súa construción participaron unha media de 50 fornecedores, que deron emprego a máis de 250 persoas durante a fase de obra.

Mercadona inaugura hoxe un novo supermercado en Puertollano (Cidade Real), concretamente na estrada de Argamasilla, s/n (Polígono Industrial Escaparate). Este supermercado, que abre co Novo Modelo de Tenda Eficiente de Mercadona e en cuxa construción participaron 50 fornecedores que deron emprego a 250 persoas durante a fase de obra, presenta un novo deseño que mellora a distribución, a decoración e a disposición de todas as seccións co obxectivo de mellorar e optimizar a experiencia de compra dos seus "Xefes", como a compañía denomina internamente os seus clientes. A abertura desta tenda supón o peche do centro que Mercadona posuía na rúa Torrecilla desta localidade.

A nova tenda eficiente de Mercadona en Puertollano conta cunha superficie de sala de vendas de 1.819 metros cadrados e dispón dun deseño totalmente renovado respecto do anterior modelo de tenda con novas cores e materiais, quer na fachada exterior de acceso ao supermercado quer na distribución das diferentes seccións. Aposta por amplos espazos diáfanos que facilitan a entrada de luz natural e cores cálidas na delimitación dos diferentes ambientes.

Novidades en todas as seccións

Ademais, presenta novidades en todas as seccións das que se benefician tanto os “Xefes” (clientes) como os traballadores, os fornecedores e a sociedade. Dispón, por exemplo, dunha nova entrada con duplo acristalado que evita correntes de aire, de andeis específicos para o leite fresco e os zumes refrixerados, dunha máquina de zume de laranxa acabado de espremer, dun novo punto de acabado para a carne, dunha góndola central na perfumería para a cosmética especializada e dunha nova exposición na peixería para os produtos de cuncha. Tamén conta cunha nova sección de forno con rebandadora de pan e pastelería refrixerada e cunha nova chacinería con xamón ao corte e mais envasado, entre outras novidades.

Este novo Modelo de Tenda Eficiente de Mercadona tamén procura ofrecer un mellor servizo para facilitar o acto de compra dos clientes mediante a ampliación dos corredores da froita e dos vexetais, dun novo modelo de cesta da compra e de dous modelos de carros, moito máis ergonómicos e lixeiros.

Adicionalmente, co obxectivo de facilitar as tarefas cotiás dos traballadores, este novo modelo de supermercado inclúe múltiples medidas para mellorar a ergonomía e eliminar os sobreesforzos. Para o deseño do novo moble de caixa, Mercadona contou coa colaboración do Instituto de Biomecánica de Valencia. Para alén de dispor de zonas comúns para que os empregados gocen dunha maior comodidade nos seus momentos de lecer, así como dunha zona comedor máis equipada e duns armarios persoais máis amplos e cómodos.

Aforro enerxético e xestión totalmente informatizada: tenda eco-eficiente

A nivel medioambiental, tomáronse medidas que permiten reducir até nun 40% o consumo enerxético respecto do modelo de tenda convencional, por mor da mellora do illamento térmico e acústico, optimizando os materiais e o grosor de paredes e teitos e con novas arcas de conxelado máis eficientes enerxeticamente e respectuosas co medio ambiente. Alén de contar cun sistema de iluminación LED automatizado que se regula segundo as zonas e os momentos do día, para unha xestión enerxética moito máis eficiente. 

Do mesmo xeito, este Novo Modelo de Tenda de Mercadona, completamente conectada tecnoloxicamente, integra unha serie de dispositivos electrónicos e ferramentas colaborativas para os traballadores, coas que poderen compartir información desde calquera sección da tenda, facilitando a autoxestión de cada supermercado e axilizando os procesos de toda a cadea. Entre os novos dispositivos encóntranse, por exemplo, a liña de caixas, as balanzas ou o uso de tabletas electrónicas que substitúen o papel para realizar as xestións administrativas. Todo isto permite optimizar os procesos e coñecer a xestión da tenda en tempo real, facilitando a toma de decisións e contribuíndo a unha maior axilidade, especialmente, na xestión dos produtos frescos. 

O horario de abertura dos supermercados é de luns a sábado, de  09h00 a 21h30 e dispoñen de aparcadoiro de 137 prazas para facilitarlles o acto de compra a todos os clientes que se movan en vehículo privado. Ademais, Mercadona habilitou o seu servizo a domicilio e a compra online.

Con estas novas aberturas, os clientes de Mercadona beneficiaranse da súa coñecida política comercial S.P.B. (Sempre Prezos Baixos), que a compañía emprega de xeito exclusivo e que consiste en garantir o menor prezo unitario dos produtos, coa mellor calidade, de forma permanente. Grazas a isto, Mercadona pode ofrecerlles aos seus clientes unha variedade eficaz, con independencia de quen fabrique o produto, coa máxima calidade e ao mínimo prezo posible.

Mercadona ten previsto para o exercicio 2017 investir 180 millóns de euros en reformar e renovar con este Novo Modelo de Tenda Eficiente 126 tendas repartidas por toda España, así como investir 5 millóns de euros en I+D+i en novas melloras informáticas.

Mercadona en Castela-A Mancha: 1.379 millóns de euros en compras a fornecedores castelán-manchegos

Mercadona conta en Castela-A Mancha con 78 supermercados e creou no último ano 40 postos de traballo fixos, até atinxir a cifra de 3.495 persoas, todas elas con contrato estable e de calidade. Con isto, a compañía reforzou o compromiso que mantén coa xeración de emprego estable na rexión.

Ademais, a aposta de Mercadona por Castela-A Mancha viuse reflectida nun volume de compras a fornecedores castelán-manchegos por valor de 1.379 millóns de euros, un 3% máis que no ano anterior. O efecto dinamizador da compañía volveu ser, un ano máis, unha constante, grazas á relación comercial que a empresa mantén con máis de 554 pemes castelán-manchegas e que, xunto aos seus fabricantes interfornecedores, investiron máis de 61 millóns de euros en Castela-A Mancha e xera un total de 14.977 empregos directos e mais indirectos.